ട്രംപിന്റെ ക്വട്ടേഷൻ നെതന്യാഹു നടപ്പാക്കുന്നോ? നിങ്ങൾ തോൽക്കാൻ പോകുന്നു, വൈകും മുമ്പ് വഴങ്ങാൻ ഇറാനോട് ആഹ്വാനം ചെയ്ത് ട്രംപ്

ഇസ്രായേൽ – ഇറാൻ സംഘർഷം കനക്കുന്നതിനിടെ ഇറാന് മുന്നറിയിപ്പുമായി വീണ്ടും അമേരിക്കൻ പ്രസിഡന്റ് ഡൊണാൾഡ് ട്രംപ്. ഏറെ വൈകും മുമ്പ് ചർച്ചകൾക്ക് തയ്യാറാകണമെന്നും ട്രംപ് ഇറാനോട് ആവശ്യപ്പെട്ടു. അതേസമയം, ഇറാനിലെ ഔദ്യോഗിക ടെലിവിഷൻ ചാനലിന് നേരെ ശക്തമായ മിസൈൽ ആക്രമണം നടത്തിയിരിക്കുകയാണ് ഇസ്രയേൽ . തത്സമയ വാർത്താ അവതരണത്തിനിടെയാണ് ആക്രമണം ഉണ്ടായത്. വാർത്താ അവതാരക ബോംബ് വീണതിന് പിന്നാലെ സീറ്റിൽ നിന്നും ഇറങ്ങിയോടുന്നതും ദൃശ്യങ്ങളിൽ പൊടിപടലങ്ങൾ നിറയുന്നതും വ്യക്തമാണ്.

എന്നാൽ ഈ ആക്രമണത്തിന് ശേഷവും ഇറാൻ്റെ ഔദ്യോഗിക ചാനൽ സംപ്രേഷണം നിർത്തിയില്ല. ആക്രമണത്തിന് പിന്നാലെ ചാനൽ വീണ്ടും പ്രക്ഷേപണം പുനരാരംഭിച്ചു.
ഇറാൻ്റെ ഔദ്യോഗിക ചാനൽ ഐആ‌ർഐബി ചാനലിന് നേരെയാണ് ആക്രമണം നടന്നത്. ആക്രമണത്തിന് പിന്നാലെ അവതാരക സ്ഥാനത്ത് തിരിച്ചെത്തിയ അവതാരക വീണ്ടും ആക്രമിക്കാൻ ഇസ്രയേലിനെ വെല്ലുവിളിച്ചു. ഇസ്രായേലിന്റെ ആക്രമണത്തിൽ നിരവധി മാധ്യമപ്രവർത്തകർ കൊല്ലപ്പെട്ടതായാണ് വിവരം.

ഇതിന് പിന്നാലെ ഇസ്രയേലിലെ ചാനൽ എൻ12, ചാനൽ 14 എന്നിവക്ക് നേരെ ഇറാൻ ആക്രമിച്ചേക്കുമെന്ന് മുന്നറിയിപ്പ് പുറത്തുവിട്ടിട്ടുണ്ട്. ടെൽ അവീവ് വിട്ടുപോകാൻ ഇസ്രയേലികളോട് ഇറാൻ മുന്നറിയിപ്പ് നൽകിയിരിക്കുകയാണ്.