തെന്നിന്ത്യൻ സിനിമാആരാധകരുടെ നടിപ്പിൻ നായകൻ സൂര്യ സിനിമാരംഗത്തേക്ക് കടന്നുവരുന്നത് 1997 ൽ പുറത്തിറങ്ങിയ നേരുക്ക് നേർ എന്ന ചിത്രത്തിലൂടെയാണ് ബാല സംവിധാനത്തിലൊരുങ്ങിയ 2001 ൽ റിലീസ് ചെയ്ത നന്ദ എന്ന ചിത്രമാണ് നടന്റെ കരിയറിൽ വഴിത്തിരിവായത്.
ഇന്ന് താരമൂല്യം ഉയർന്ന് ഒരു സിനിമയ്ക്ക് തന്നെ കോടിക്കണക്കിന് രൂപ പ്രതിഫലം വാങ്ങുന്ന നടനായി മാറിയിരിക്കുകയാണ് സൂര്യ എന്നാൽ അദ്ദേഹത്തിന്റെ ആദ്യ ശമ്പളം വെറും 736 രൂപ ആയിരുന്നുവെന്നതാണ് വാസ്തവം.
സിനിമയിൽ അഭിനയിക്കുന്നതിന് മുൻപ് ഒരു തുണി ഫാക്ടറിയിലായിരുന്നു സൂര്യ ജോലി ചെയ്തിരുന്നത്. ഒരു ദിവസം 18 മണിക്കൂറോളം ജോലി ചെയ്തതിന് ശേഷമാണ് പ്രതിഫലം ലഭിച്ചിരുന്നത് എന്ന് പറയുകയാണ് സൂര്യ. കുറേ മുൻപ് ഹിന്ദുവിന് നൽകിയ അഭിമുഖത്തിലാണ് തന്റെ ജീവിതത്തിലെ ഇത്തരം അനുഭവങ്ങൾ നടൻ പങ്കുവെച്ചത്.
“സത്യത്തിൽ അന്ന് 18 വയസാകുമ്പോൾ നമ്മളെല്ലാവരും ഭാവിയെക്കുറിച്ചൊക്കെ ചിന്തിച്ച് തുടങ്ങും. അച്ഛന്റെ (നടൻ ശിവകുമാർ) പാത പിന്തുടർന്ന് സിനിമയിൽ വരാൻ എനിക്ക് തീരെ ആഗ്രഹമില്ലായിരുന്നു. ആ സമയത്ത് എനിക്കൊരു തുണി ഫാക്ടറിയിൽ ജോലി കിട്ടി.
736 രൂപയായിരുന്നു എനിക്ക് ആദ്യത്തെ മാസം കിട്ടിയ ശമ്പളം. എല്ലാ ദിവസവും 18 മണിക്കൂർ ജോലി ചെയ്തതിനു ശേഷമാണ് എനിക്ക് അത് ലഭിച്ചിരുന്നത്. ആ പണം സൂക്ഷിച്ചിരുന്ന വെളുത്ത കവറിന്റെ ഭാരം എനിക്ക് ഇപ്പോഴും ഓർമയുണ്ട്, ബുദ്ധിമുട്ടേറിയതായിരുന്നുവെങ്കിലും ഞാനെന്റെ തൊഴിലിനെ ഇഷ്ടപ്പെട്ടു കാരണം ആ പ്രായത്തിൽ തന്നെ സ്വന്തം കാലിൽ നിൽക്കാൻ എനിക്ക് സാധിച്ചുവെന്നതാണ് “- സൂര്യ പറഞ്ഞു.
