വൈദ്യുതി ബില്ല് നിയന്ത്രിക്കാന്‍ വിവിധ തരത്തിലുള്ള വഴികള്‍ ആളുകള്‍ തേടാറുണ്ട്. എന്നാല്‍ ഇതുവരെ കേട്ടതില്‍ വെച്ച് വിചിത്രമായ പരിഹാര മാര്‍ഗ്ഗം നിര്‍ദ്ദേശിക്കുന്ന ഒരു വീഡിയോ സമൂഹ മാധ്യമങ്ങളില്‍ ഇപ്പോള്‍ വൈറലാണ്. പാക്കിസ്ഥാനില്‍ നിന്നുള്ള ഒരു പുരോഹിതനാണ് വീഡിയോയിലുള്ളത്. വര്‍ധിച്ചുവരുന്ന വൈദ്യുതി ബില്ലുകളെക്കുറിച്ചുള്ള അവതാരികയുടെ ചോദ്യത്തിന് ഇദ്ദേഹം നല്‍കുന്ന മറുപടിയാണ് വീഡിയോയിലുള്ളത്.
എക്‌സ്പ്രസ് ടിവിയിലെ ജാവേരിയ സൗദിന്റെ റമദാന്‍ ഷോയില്‍ പ്രത്യക്ഷപ്പെട്ട ഇസ്ലാമിക പണ്ഡിതനായ മൗലാന ആസാദ് ജമീലിന്റെ പഴയൊരു വീഡിയോയിലാണ് വൈദ്യുതി ബില്‍ കുറയ്ക്കുന്നതിനായി അദ്ദേഹം മുന്നോട്ട് വച്ച നിദ്ദേശമുള്ളത്. കഴിഞ്ഞ ദിവസങ്ങളില്‍ ഈ വീഡിയോ വീണ്ടും സമൂഹ മാധ്യമങ്ങളില്‍ വൈറലാവുകയായിരുന്നു.
വൈദ്യുതി ബില്‍ വളരെയധികം കൂടിക്കൊണ്ടിരിക്കുകയാണ്. അത് കുറയ്ക്കാന്‍ എന്തെങ്കിലും ഒരു പ്രാര്‍ത്ഥനയോ പ്രതിവിധിയോ പറഞ്ഞുതരാമോയെന്നാണ് ഷോയില്‍ അവതാരിക മൗലാനയോട് ചോദിക്കുന്നു. വൈദ്യുതി ബില്ല് നിയന്ത്രിക്കാനായി ആത്മീയമായ ഒരു വഴിയുണ്ടെന്ന് പറഞ്ഞുകൊണ്ടാണ് അദ്ദേഹം തന്റെ നിര്‍ദ്ദേശം വീഡിയോയില്‍ പറയുന്നത്. അദ്ദേഹം നിര്‍ദ്ദേശിച്ച പരിഹാര മാര്‍ഗ്ഗം ഇങ്ങനെയായിരുന്നു,
‘മാസത്തില്‍ രണ്ടുതവണ ചൂണ്ടുവിരല്‍ ഉപയോഗിച്ച് വൈദ്യുതി മീറ്ററില്‍ ‘സം സം’ എന്ന രണ്ട് വാക്കുകള്‍ എഴുതണം. ഇന്ന് ഒരു തവണ ഇത് ചെയ്തതിന് ശേഷം വീണ്ടും 15 ദിവസങ്ങള്‍ക്ക് ശേഷം ഇതേ കാര്യം ആവര്‍ത്തിക്കണമെന്നും ഇദ്ദേഹം പറയുന്നു. ദൈവം അനുവദിച്ചാല്‍ നിങ്ങളുടെ വൈദ്യുതി ബില്ല് തീര്‍ച്ചയായും കുറയുമെന്നും വീഡിയോയിലൂടെ മൗലാന ആസാദ് ജമീല്‍, ് ഉറപ്പ് നല്‍കി. സോഷ്യല്‍മീഡിയയില്‍ ഇയാളുടെ വീഡിയോ വൈറലായതിന് പിന്നാലെ നിരവധി പേരാണ് കമന്റുകളുമായി എത്തിയത്. അല്‍പ്പം ബുദ്ധിയുണ്ടായിരുന്നെങ്കില്‍ മന്ദബുദ്ധിയെന്നെങ്കിലും വിളിക്കാമായിരുന്നെന്നാണ് ചിലര്‍ പറയുന്നത്.
