പ്രവചനങ്ങൾ കൊണ്ട് ലോകപ്രശസ്തയായ ആളാണ് ‘ബാബ വാംഗ’. ലോകമെമ്പാടും സംഭവിച്ച കാര്യങ്ങൾ വളരെക്കാലം മുമ്പേ ഇവർ പ്രവചിച്ചിട്ടുണ്ട്. ഇപ്പോഴിതാ റിയോ തറ്റ്സുകി എന്ന ‘ന്യൂ ബാബ വാംഗ’ യാണ് ജപ്പാനിൽ വൈറലായി കൊണ്ടിരിക്കുന്നത്. ഇവർ തന്റെ പുസ്തകത്തിൽ നടത്തിയ ചില പ്രവചനങ്ങളുടെ പേരിലാണ് ഇത്.
‘ദി ഫ്യൂച്ചർ ഐ സോ’ എന്ന പുസ്തകം എഴുതിയ മാംഗ കലാകാരിയാണ് ഇവർ. 1999 -ലാണ് ഈ പുസ്തകം പ്രസിദ്ധീകരിച്ചത്. നിരവധി പ്രവചനങ്ങൾ ഉള്ള പുസ്തകത്തിൽ 2025 -ൽ ഒരു വലിയ ദുരന്തം ജപ്പാനെ വലിയ രീതിയില്‍ ബാധിക്കും എന്നും പറഞ്ഞിരുന്നു. ഇതാണ് ഇപ്പോൾ ജാപ്പനീസ് ജനങ്ങളെ ഭയപ്പെടുത്തുന്നത്
2011 -ൽ ജപ്പാനിലുണ്ടായ തോഹേകു ഭൂകമ്പവും സുനാമിയും ഇവരെ എല്ലാവരും വിശ്വസിക്കുന്നതിനുള്ള കാരണമായി. ഇതിന്റെ ഭാഗമായുണ്ടായ ഫുകുഷിമ ഡൈച്ചി ആണവ ദുരന്തത്തിൽ 18,000-ത്തിലധികം പേരാണ് മരിച്ചത്. തോഹോകു ഭൂകമ്പം, 1995 -ലെ കോബെ ഭൂകമ്പം, ഫെഡ്രി മെര്‍ക്കുറിയുടെ മരണം ഇവയെല്ലാം തറ്റ്സുകി നേരത്തെ പ്രവചിച്ചിരുന്നുവെന്നാണ് ഇവരിൽ വിശ്വസിക്കുന്നവർ പറയുന്നത്.
ഇതേ പുസ്തകത്തിൽ തന്നെയാണ് 2025 ജൂലൈയിൽ ഒരു വലിയ ദുരന്തത്തിന് ജപ്പാൻ സാക്ഷ്യം വഹിക്കും എന്നും പറയുന്നത്. ഇത്തരം പ്രചരണങ്ങൾ ശക്തമായതിന്റെ ഭാഗമായി ജൂലൈയിൽ ജപ്പാനിലേക്കുള്ള വിനോദസഞ്ചാരികളുടെ ബുക്കിംഗിൽ വലിയ കുറവ് നേരിട്ടിട്ടുണ്ട്. ഹോട്ടൽ ബുക്കിംഗിലും വിമാന ബുക്കിംഗിലും വലിയ കുറവുണ്ട് എന്ന് റിപ്പോർട്ടുകൾ പറയുന്നു.
