പ്രതിരോധരംഗത്ത് പുത്തൻ നേട്ടവുമായി ഇന്ത്യ. ആര്‍ട്ടിഫിഷ്യല്‍ ഇന്‍റലിജന്‍സ് സഹായത്തോടെ പ്രവര്‍ത്തിക്കുന്ന ലൈറ്റ് മെഷീന്‍ ഗണ്‍ (എല്‍എംജി) വിജയകരമായി പരീക്ഷിച്ചിരിക്കുകയാണ്. സമുദ്രനിരപ്പില്‍ നിന്ന് 14,000 അടി ഉയരത്തിലുള്ള പ്രദേശത്താണ് ഇന്ത്യന്‍ സൈന്യം നെഗെവ് എല്‍എംജി (AI-enabled Negev system) പരീക്ഷിച്ചത് . ഡെറാഡൂണ്‍ ആസ്ഥാനമായുള്ള പ്രതിരോധ സ്ഥാപനമായ ബിഎസ്എസ് മെറ്റീരിയല്‍ ലിമിറ്റഡാണ് നിര്‍മ്മാതാക്കള്‍.
എത്ര പ്രതികൂലമായ പ്രദേശങ്ങളിലും എതിരാളികളെ സ്വയം തിരിച്ചറിഞ്ഞ് വെടിയുതിര്‍ക്കാന്‍ ശേഷിയിലുള്ളതാണ് ഇന്ത്യ വികസിപ്പിച്ച ഈ എഐ ലൈറ്റ് മെഷീന്‍ ഗണ്‍. ഉയര്‍ന്ന ഭൂപ്രദേശങ്ങള്‍ നിറഞ്ഞ ഇന്ത്യയുടെ അതിര്‍ത്തിപ്രദേശങ്ങളില്‍ ആര്‍ട്ടിഫിഷ്യല്‍ ഇന്‍റലിജന്‍സ് സഹായത്തോടെ പ്രവര്‍ത്തിക്കുന്ന ഈ എല്‍എംജി വിജയകരമാകും എന്നാണ് പ്രതീക്ഷ.
പരീക്ഷണഘട്ടത്തില്‍ 14,000 അടി ഉയരത്തില്‍ വച്ച് ഈ എഐ അധിഷ്ഠിത ലൈറ്റ് മെഷീന്‍ ഗണ്‍ കൃത്യതയും സ്ഥിരതയും തെളിയിച്ചു. മെയ്ക്ക് ഇന്‍ ഇന്ത്യ, ആത്മനിര്‍ഭര്‍ ഭാരത് പദ്ധതികള്‍ക്ക് കീഴില്‍ ഇന്ത്യന്‍ സേനയെ തദ്ദേശീയ സാങ്കേതികവിദ്യകള്‍ ഉപയോഗിച്ച് ആധുനികവത്ക്കരിക്കാനുള്ള ശ്രമങ്ങളില്‍ നിര്‍ണായകമായ പരീക്ഷണമാണ് വിജയത്തിലെത്തിയത്.
ഉയര്‍ന്ന പ്രദേശങ്ങളിലും ലക്ഷ്യസ്ഥാനം സ്വയം തിരിച്ചറിയാനും വെടിയുതിര്‍ക്കാനും ശേഷിയുള്ളതാണ് ബിഎസ്എസ് മെറ്റീരിയല്‍ വികസിപ്പിച്ച എഐ അധിഷ്ഠിത ലൈറ്റ് മെഷീന്‍ ഗണ്‍. പ്രത്യേകം തയ്യാറാക്കിയ മള്‍ട്ടി-സെന്‍സര്‍ എഐ മൊഡ്യൂളാണ് ഇതിന് പ്രാപ്തമാക്കുന്നത്. കൃത്യതയുള്ള ടാർഗെറ്റിംഗിനായി തെർമൽ, ഒപ്റ്റിക്കൽ സെൻസർ സംയോജനം, എന്‍ക്രിപ്റ്റഡായ റിമോട്ട് കമാന്‍ഡ് ശേഷി തുടങ്ങിയ ധാരാളം സവിശേഷതകള്‍ ഈ പുതിയ ആയുധത്തിനുണ്ട്.
