ദില്ലി: യുഎന്‍ രക്ഷാസമിതിയില്‍ വെച്ച് പാകിസ്ഥാനെതിരെ ഇന്ത്യ. ഇന്ത്യയുടെ മണ്ണിലേക്ക് കടന്ന് ഭീകരപ്രവര്‍ത്തനം നടത്തുന്ന പാകിസ്ഥാന് ആഗോള സുരക്ഷയെക്കുറിച്ച് ചര്‍ച്ച ചെയ്യുന്ന സദസുകളില്‍ പങ്കെടുക്കാന്‍ പോലും അര്‍ഹതയില്ലെന്ന് ഇന്ത്യ വ്യക്തമാക്കി. സാധാരണ ജനങ്ങളുടെ പേരില്‍ ഭീകരരെയാണ് പാകിസ്ഥാന് സംരക്ഷിക്കുന്നത് എന്നും ഇന്ത്യയുടെ സ്ഥിരം പ്രതിനിധി പി.ഹരീഷ് വ്യക്തമാക്കി.
പൗരന്‍മാരെ സംരക്ഷിക്കാനാണ് ഇന്ത്യയിലേക്ക് ആക്രമണം നടത്തിയതെന്ന പാക് ആരോപണത്തിന് ഇരട്ടമുഖമുള്ള നിലപാട് എന്നാണ് മറുപടിയായി ഇന്ത്യ തുറന്നടിച്ചത്. യുഎന്‍ തന്നെ ലിസ്റ്റ് ചെയ്ത ഭീകരരുടെ സംസ്‌കാരച്ചടങ്ങുകളില്‍ പാകിസ്ഥാനിലെ ഉന്നത സൈനികോദ്യോഗസ്ഥര്‍ പങ്കെടുത്തത് ദൃശ്യങ്ങള്‍ സഹിതം ഇന്ത്യ ചൂണ്ടിക്കാട്ടി.
പാകിസ്ഥാന് നടത്തിയ ആക്രമണത്തില്‍ സാധാരണക്കാരും വിവിധ സുരക്ഷാ സേനാംഗങ്ങളും അടക്കം ഇരുപതിലധികം പേര്‍ കൊല്ലപ്പെട്ടെന്നും എണ്‍പതിലധികം പേര്‍ക്ക് പരിക്കേറ്റെന്നും ഇന്ത്യ യുഎന്‍ രക്ഷാ സുരക്ഷാ സമിതിയെ അറിയിച്ചു. അംബാസിഡര്‍ അസിം ഇഫ്തിഖര്‍ അഹമ്മദാണ് ചര്‍ച്ചയില്‍ പാകിസ്ഥാനെ പ്രതിനിധീകരിച്ച് സംസാരിച്ചത്.
അതേസമയം, പാക് ഭീകരത ലോകത്തിന് മുന്നില്‍ തുറന്ന് കാട്ടാനുള്ള ഇന്ത്യന്‍ പ്രതിനിധി സംഘങ്ങളുടെ ലോകപര്യടനം തുടരുകയാണ്. സഞ്ജയ് കുമാര്‍ ഷാ അധ്യക്ഷനായ, ജോണ്‍ ബ്രിട്ടാസ് എംപി അംഗമായ, പ്രതിനിധി സംഘം കൊറിയയില്‍ എത്തി. ശ്രീകാന്ത് ഷിന്‍ഡെയുടെ നേതൃത്വത്തില്‍, ഇ ടി മുഹമ്മദ് ബഷീര്‍ അംഗമായ സംഘം കോംഗോയിലെത്തി. എന്‍സിപി എംപി സുപ്രിയ സുലെയുടെ അധ്യക്ഷതയിലുള്ള സംഘം ഖത്തറിലെത്തിയിട്ടുണ്ട്.
