അഞ്ച് പതിറ്റാണ്ടോളമായി തെലുങ്ക് ചലച്ചിത്രരംഗത്തെ നിറസാന്നിധ്യമാണ് മെഗാസ്റ്റാര്‍ ചിരഞ്ജീവി . മാസ് ചിത്രങ്ങളിലൂടെ താരസിംഹാസനത്തിലേറിയ നടന്‍ ഇപ്പോള്‍ ഇതേക്കുറിച്ച് പറഞ്ഞ വാക്കുകളാണ് ആരാധകരെ ഞെട്ടിച്ചിരിക്കുന്നത്. ഫോര്‍മുല മാസ് സിനിമകളില്‍ തുടര്‍ച്ചയായി അഭിനയിച്ച് ചിരഞ്ജീവിക്ക് മടുത്തെന്നാണ് തെലുങ്ക് സിനിമയിലെ തിരക്കഥാകൃത്തും നിര്‍മ്മാതാവുമായ കോന വെങ്കട് പറയുന്നത്.
ഗലാട്ട തെലുങ്കിന് നല്‍കിയ അഭിമുഖത്തിലാണ് വെങ്കട് ഇക്കാര്യം പറയുന്നത്. നാടകീയമായ ഫ്‌ലാഷ് ബാക്കുകളും മാസ് ഹീറോ പരിവേഷത്തിനായുള്ള സ്ഥിരം ഘടകങ്ങളുമൊക്കെ അദ്ദേഹത്തിന് മടുത്ത മട്ടാണ്. സാധാരണവും റിയലിസ്റ്റിക്കുമായ കഥാപാത്രങ്ങളെ അവതരിപ്പിക്കാനുള്ള ആഗ്രഹമുണ്ട് അദ്ദേഹത്തിന്. എന്തുകൊണ്ട് അത്തരം കഥാപാത്രങ്ങളെ താന്‍ അവതരിപ്പിക്കുന്നില്ലെന്ന് അദ്ദേഹം സ്വയം ചോദിക്കുന്നുണ്ട് ഇപ്പോള്‍. എപ്പോഴാണ് ഞാന്‍ പുതിയ ചിത്രങ്ങള്‍ ഉണ്ടാക്കുക? എനിക്ക് ബോറടിക്കുന്നു, എന്നൊക്കെയാണ് അദ്ദേഹം പറഞ്ഞത്. സ്ഥിരം പാറ്റേണ് വിട്ടുള്ള പടങ്ങള്‍ ചെയ്യണമെന്നാണ് അദ്ദേഹത്തിന്, വെങ്കട് പറഞ്ഞു.
1987 ല്‍ പുറത്തിറങ്ങിയ സ്വയംകൃഷി എന്ന ചിത്രമെടുക്കാം. ചിരഞ്ജീവി നായകനായ ചിത്രം ഫോക്കസ് ചെയ്തത് കഥപറച്ചിലിലും കഥാപാത്രങ്ങളുടെ ആഴത്തിലുമൊക്കെയാണ്. മറിച്ച് പാട്ടിലോ നൃത്തത്തിലോ ആക്ഷന്‍ രംഗങ്ങളിലോ ഒന്നും ആയിരുന്നില്ല. എന്നാല്‍ അത് ബോക്‌സ് ഓഫീസില്‍ വിജയിച്ചില്ല.
ആക്ഷന്‍ രംഗങ്ങളും ഐറ്റം ഗാനങ്ങളും അടക്കമുള്ള വാണിജ്യ ഫോര്‍മുലാ ഘടകങ്ങള്‍ ഇല്ലാത്തതിനാല്‍ മാസ് പ്രേക്ഷകര്‍ക്ക് താല്‍പര്യം നഷ്ടപ്പെടും, കോന വെങ്കട് കൂട്ടിച്ചേര്‍ത്തു.
