വിചിത്രമായ ഒരു കള്ളക്കടത്തിന്റെ കഥയാണ് ചൈനയിൽ നിന്നുവരുന്നത്. പരിശോധനയ്ക്കിടെ ചൈനീസ് കസ്റ്റംസ് ഒരു യുവാവിന്റെ പാന്റിനുള്ളിൽ നിന്ന് നൂറിലധികം ജീവനുള്ള പാമ്പുകളെ കണ്ടെടുക്കുകയായിരുന്നു, ഹോംകോംഗ് ഷെൻസൺ അതിർത്തിയിൽ നടത്തിയ പരിശോധനയിലാണ് ഈ വിചിത്രമായ സംഭവം അവർ കണ്ടെത്തിയത്.
പല വലിപ്പത്തിലും നിറത്തിലുമുള്ള പാമ്പുകളെ വിവിധ കവറുകളിലാക്കി ഇയാൾ തന്റെ പാന്റിന്റെ പോക്കറ്റുകളിൽ അളിച്ചു കടത്തുകയായിരുന്നു. പല തവണ ചോദ്യം ചെയ്തെങ്കിലും ഇയാളുടെ ഉദ്ദേശത്തെക്കുറിച്ചുള്ള ഒരു സൂചനയും ലഭിച്ചിട്ടില്ല. അതിനൊപ്പം തന്നെ പാമ്പുകൾ സംരക്ഷിത വർഗ്ഗത്തിൽ പെട്ടവയാണോ കരിഞ്ചന്തയിൽ പണം ധാരാളം ലഭിക്കുന്ന ഇനത്തിൽ പെട്ടവയാണോ എന്നറിയാനുള്ള പരിശോധനയും നടക്കുകയാണ്.
പാമ്പുകളെയുമായി അധികൃതർ നിൽക്കുന്ന വീഡിയോ ഇപ്പോൾ സോഷ്യൽമീഡിയയിൽ വൈറലാണ്. എന്തായാലും ഇയാളെ അന്വേഷണത്തിന്റെ ഭാഗമായി അറസ്റ്റ് ചെയ്തിട്ടുണ്ട്. വരും ദിവസങ്ങളിൽ സംഭവത്തിന്റെ കൂടുതൽ വ്യക്തത വരുമെന്നാണ് പ്രതീക്ഷിക്കുന്നത്. എന്നാൽ പല വിധ അന്ധവിശ്വാസങ്ങളുടെ ഭാഗമായി പാമ്പുകളെ വിൽക്കാറുണ്ട്. ചൈനീസ് സംസ്കാരത്തിൽ പാമ്പുകൾക്ക് പല വിശ്വാസങ്ങളുമായി ബന്ധമുണ്ട്. അത്തരത്തിൽ എന്തെങ്കിലുമാണോ ഇതെന്നും അന്വേഷണം നടന്നുവരികയാണ്.
അതേസമയം, സോഷ്യൽമീഡിയയിലും സംഭവം വലിയ ചർച്ചയായി. ഇയാളെ ലോകത്തിലെ ഏറ്റവും ധൈര്യശാലിയായി പ്രഖ്യാപിക്കണമെന്നാണ് പലരുടെയും അഭിപ്രായം.
