37 വർഷങ്ങൾക്ക് ശേഷം കമൽഹാസനും മണിരത്നവും ഒന്നിക്കുന്ന ചിത്രം ഈ ഹൈപ്പോടെയാണ് തഗ്ലൈഫ് തീയേറ്ററുകളിലെത്തിയത്. ആദ്യം ഇരുകൈകളും നീട്ടിയാണ് ആരാധകർ ചിത്രത്തിന്റെ ട്രെയിലറും ടീസറുമെല്ലാം സ്വീകരിച്ചത്. എന്നാൽ തിയേറ്ററിൽ ആ ഹൈപ്പൊന്നും ഫലം കണ്ടില്ല. ആദ്യ ഷോ മുതൽ ട്രോളുകളും വിമർശനങ്ങളും ഉയർന്നു. ഇപ്പോഴിതാ പൂർണ്ണമായും ചിത്രം ബോക്സോഫീസിൽ തകർന്നിരിക്കുകയാണ്.
തഗ് ലൈഫിന്റെ പരാജയത്തിൽ പ്രതികരണവുമായി മണിരത്നവും രംഗത്ത് എത്തിയിരുന്നു. പ്രേക്ഷകർക്ക് വേറിട്ട അനുഭവം സമ്മാനിക്കാനാണ് ശ്രമിച്ചതെന്നും എന്നാലതിൽ പരാജയപ്പെട്ടുവെന്നും ക്ഷമിക്കണമെന്നും മണിരത്നം പറഞ്ഞിരുന്നു. ഈ അവസരത്തിൽ തഗ് ലൈഫ് ഇതുവരെ നേടിയ ബോക്സ് ഓഫീസ് കളക്ഷൻ വിവരങ്ങൾ പുറത്തുവരികയാണ്.
200 കോടി ബജറ്റിലാണ് തഗ് ലൈഫ് ഇറങ്ങിയത്. എന്നാൽ റിലീസ് ചെയ്ത് പത്തൊൻപത് ദിവസം വരെ മുടക്കു മുതലിന്റെ 24 ശതമാനം മാത്രമാണ് ചിത്രത്തിന് നേടാനായതെന്ന് എന്റർടെയ്മെന്റ് സൈറ്റായ കോയ്മോയ് റിപ്പോർട്ട് ചെയ്യുന്നു.
പത്തൊൻപതാം ദിവസം ഒരു ലക്ഷം രൂപ മാത്രമാണ് തഗ് ലൈഫിന് നേടാനായത്. 19-ാം ദിവസം 66 ശതമാനത്തിന്റെ ഇടിവാണ് രേഖപ്പെടുത്തിയത്. ഇതിന്റെ അടിസ്ഥാനത്തിൽ 48.13 കോടിയാണ് ചിത്രത്തിന്റെ ഇതുവരെയുള്ള ഇന്ത്യ നെറ്റ് കളക്ഷൻ. 50 കോടി പിന്നിടാൻ ഇനി 1.87 കോടി രൂപ തഗ് ലൈഫിന് ആവശ്യമാണ്. നികുതി ഉൾപ്പെടെ 56.79 കോടിയാണ് കമൽഹാസൻ നായകനായ ചിത്രത്തിൻ്റെ ഗ്രോസ് കളക്ഷൻ.
