വാടകവീടുകൾ താമസിക്കാനായി തിരയുമ്പോൾ പല വിചിത്രമായ ഡിമാൻഡുകളും കാണാം. എന്നാൽ, ബെംഗളൂരുവിൽ നിന്നും വാടകക്കാരെ തേടിയുള്ള വളരെ വേറിട്ട ഒരു പോസ്റ്റാണ് ഇപ്പോൾ സോഷ്യൽ മീഡിയയിൽ വൈറലായിരിക്കുന്നത്.
വീട്ടിലേക്ക് വാടകക്കാരെ തിരയുന്ന ഈ പോസ്റ്റിൽ പറയുന്നത്, സ്ത്രീകൾക്ക് മാത്രമേ വീട് നൽകൂ എന്നാണ്. അത് പുക വലിക്കുന്നവരായിരിക്കാം, നോൺ വേജിറ്റേറിയനായാലും കുഴപ്പമില്ല എന്തിനേറെ പറയുന്നു, സാത്താനെ പൂജിക്കുന്നവരായാലും കുഴപ്പമില്ല, ഇതെല്ലാം അനുവദനീയമാണ്. പക്ഷേ, ദയയോടെയുള്ള പെരുമാറ്റമായിരിക്കണം എന്നും പോസ്റ്റിൽ പറയുന്നു. മര്യാദയ്ക്ക് പെരുമാറാത്തവർക്ക് വീട് നൽകില്ല എന്ന് അർത്ഥം.
എക്‌സിൽ (ട്വിറ്റർ) ഷെയർ ചെയ്തിരിക്കുന്ന പോസ്റ്റിൽ യുവതി പറയുന്നത്, താൻ തന്റെ തികച്ചും പ്രിയപ്പെട്ട സ്ഥലം വിട്ടുപോവുകയാണ് എന്നാണ്. എംബസി ഗോൾഫ് ലിങ്ക്സിന് (EGL) സമീപമുള്ള തന്റെ 3BHK ഫ്ലാറ്റിലെ മാസ്റ്റർ ബെഡ്‌റൂമിലേക്കാണ് അവർ ഒരു വാടകക്കാരിയെ അന്വേഷിക്കുന്നത്. ഡോംലൂർ, ഇന്ദിരാനഗർ, HAL എന്നിവിടങ്ങളിൽ ജോലി ചെയ്യുന്നവർക്കോ വിൻഡ് ടണൽ റോഡ് വഴി ബെല്ലന്ദൂരിലേക്ക് യാത്ര ചെയ്യുന്നവർക്കോ ഒക്കെ ഈ സ്ഥലം സൗകര്യപ്രദമാണ് എന്നും പോസ്റ്റിൽ കാണാം.
18,300 രൂപയാണ് വാടക. റീഫണ്ടബിൾ ഡെപ്പോസിറ്റ് ആയി നൽകേണ്ടത് 38,000 രൂപയാണ്. അതുപോലെ വൺടൈം സെറ്റപ്പ് കോസ്റ്റ് എന്നു പറഞ്ഞ് 22,000 രൂപയും നൽകണമെന്ന് പറയുന്നുണ്ട്. വീട് മുഴുവനായും ഫർണിഷ് ചെയ്തിരിക്കുന്നതാണ്. ധാരാളം സ്റ്റോറേജ് സൗകര്യമുണ്ട്, നല്ല വെന്റിലേഷനുണ്ട് എന്നെല്ലാം പോസ്റ്റിലുണ്ട്.എന്തായാലും യുവതിയുടെ പരസ്യത്തിന് വലിയ ശ്രദ്ധയാണ് ലഭിച്ചിരിക്കുന്നത്.
