ഹൈപ്പർസോണിക് മിസൈലുകളും അവയുടെ നിർമ്മാണത്തിനുള്ള സാങ്കേതികവിദ്യയും പാകിസ്ഥാന് നൽകാൻ വിസമ്മതിച്ച് ചൈന. അമേരിക്കയുമായി പാകിസ്ഥാൻ അടുത്തിടെ സൗഹൃദം സ്ഥാപിച്ച സാഹചര്യത്തിൽ, ചൈനീസ് നിർമ്മിത നൂതന മിസൈൽ സംവിധാനങ്ങൾ പരിശോധിക്കാൻ അമേരിക്കൻ വിദഗ്ധരെ പാകിസ്ഥാൻ അനുവദിച്ചേക്കുമെന്ന് ചൈന ഭയപ്പെടുന്നതായി മാധ്യമ റിപ്പോർട്ടുകൾ പറയുന്നു. സമീപകാല ഇന്ത്യ-പാകിസ്ഥാൻ സംഘർഷത്തിൽ പാകിസ്ഥാൻ ഉപയോഗിച്ച ചൈനീസ് ആയുധങ്ങളുടെ മോശം പ്രകടനത്തെക്കുറിച്ചുള്ള ആശങ്കയാണ് മറ്റൊരു കാരണം.
ഹൈപ്പർസോണിക് മിസൈലുകളുടെ കയറ്റുമതി വകഭേദങ്ങളോ ഹൈപ്പർസോണിക് വാർഹെഡുകൾ ഘടിപ്പിച്ച DF-17 പോലുള്ള നിലവിലുള്ളവയോ കയറ്റുമതിക്ക് അനുമതി നൽകിയിട്ടില്ലെന്ന് ചൈന പാകിസ്ഥാനെ അറിയിച്ചിട്ടുണ്ടെന്ന് സ്രോതസ്സുകളെ ഉദ്ധരിച്ച് ഇന്ത്യൻ ഡിഫൻസ് റിസർച്ച് വിംഗ് (ഐഡിആർഡബ്ല്യു) പറയുന്നുയ.
ഹൈപ്പർസോണിക് സാങ്കേതികവിദ്യ വികസിപ്പിക്കുകയും അതിൽ വൈദഗ്ദ്ധ്യം നേടുകയും ചെയ്ത ചുരുക്കം ചില രാജ്യങ്ങളിൽ ഒന്നാണ് ചൈന, കൂടാതെ അമേരിക്കയ്ക്കും സഖ്യകക്ഷികൾക്കും എതിരായ തന്ത്രപരമായ പ്രതിരോധത്തിന്റെ നിർണായക ഘടകമായി ഇതിനെ കാണുകയും ചെയ്യുന്നു. അതുകൊണ്ടാണ്പാ കിസ്ഥാൻ പോലുള്ള ഒരു അടുത്ത സഖ്യകക്ഷിക്ക് പോലും ചൈന ഈ തന്ത്രപരമായ ആയുധങ്ങൾ കയറ്റുമതി ചെയ്യാൻ വിസമ്മതിക്കുന്നതെന്ന് വിദഗ്ദ്ധർ വിശ്വസിക്കുന്നു.
അതേസമയം, മിസൈൽ സാങ്കേതികവിദ്യയിൽ ഇന്ത്യയുടെ ദ്രുതഗതിയിലുള്ള പുരോഗതിയെ, പ്രത്യേകിച്ച് തദ്ദേശീയ ഹൈപ്പർസോണിക്, ബാലിസ്റ്റിക് മിസൈൽ സംവിധാനങ്ങളുടെ വികസനത്തെ പ്രതിരോധിക്കുന്നതിനായി പാകിസ്ഥാൻ തങ്ങളുടെ ആയുധശേഖരം, പ്രത്യേകിച്ച് മിസൈൽ സംവിധാനങ്ങൾ, അതിവേഗം വികസിപ്പിക്കുകയാണ്. ചൈനീസ് ഹൈപ്പർസോണിക് മിസൈലുകൾ സ്വന്തമാക്കുന്നതിലൂടെ, ഹൈപ്പർസോണിക് ടെക്നോളജി ഡെമോൺസ്ട്രേറ്റർ വെഹിക്കിൾ (HSTDV) പോലുള്ള ആഭ്യന്തര ഹൈപ്പർസോണിക് കഴിവുകൾ വികസിപ്പിച്ചെടുത്ത ഇന്ത്യയുമായുള്ള സാങ്കേതിക വിടവ് നികത്താനാണ് പാകിസ്ഥാന്റെ ഉന്നം.
യുഎസ് ഇന്റൽ റിപ്പോർട്ടിന്റെ അടിസ്ഥാനത്തിൽ, പാകിസ്ഥാന്റെ സൈനിക ശക്തിയും സമ്പദ്‌വ്യവസ്ഥയും പൂർണ്ണമായും ചൈനയെ ആശ്രയിച്ചിരിക്കുന്നു, ഇത് ദക്ഷിണേഷ്യയ്ക്ക് ഒരു പ്രധാന ആശങ്കയാണ്, കാരണം ഭാവിയിലെ ഏതൊരു ഇന്ത്യ-പാകിസ്ഥാൻ സംഘർഷവും യുദ്ധവിമാനങ്ങൾ, വ്യോമ പ്രതിരോധ സംവിധാനങ്ങൾ, മിസൈലുകൾ തുടങ്ങിയ ആയുധങ്ങളുടെ പരീക്ഷണ കേന്ദ്രമായി ചൈന ഉപയോഗിക്കാൻ സാധ്യതയുണ്ട്.
പാകിസ്ഥാന്റെ മൊത്തം പ്രതിരോധ ഇറക്കുമതിയുടെ 80 ശതമാനവും ചൈനയിൽ നിന്നാണ് വരുന്നതെന്ന് റിപ്പോർട്ട് പറയുന്നു.
