തീപിടുത്തത്തിനുള്ള സാധ്യത മൂലം ജർമ്മൻ ആഡംബര കാർ നിർമ്മാതാക്കളായ മെഴ്‌സിഡസ്-ബെൻസ് അടുത്തിടെ ഇന്ത്യയിൽ വിറ്റഴിച്ച ചില ജനപ്രിയ മോഡലുകൾ തിരിച്ചുവിളിച്ചു. എസ് ക്ലാസ്, ജിഎൽസി എസ്‌യുവി, എഎംജി എസ്എൽ 55, ഇക്യുഎസ് ഇലക്ട്രിക് സെഡാൻ തുടങ്ങിയ ഉയർന്ന നിലവാരമുള്ള കാറുകളാണ് കമ്പനി തിരിച്ചുവിളിച്ചിരിക്കുന്നത്.
തീപിടുത്തത്തിനുള്ള സാധ്യതയ്ക്ക് കാരണമായേക്കാവുന്ന ചില സാങ്കേതിക തകരാറുകൾ ഈ കാറുകളിൽ കണ്ടെത്തിയിട്ടുണ്ടെന്നും ഇവ എഞ്ചിൻ അല്ലെങ്കിൽ ഇലക്ട്രിക്കൽ സിസ്റ്റവുമായി ബന്ധപ്പെട്ടതാകാം എന്നും കമ്പനി പറയുന്നു.ഇത് കൃത്യസമയത്ത് പരിഹരിക്കുക എന്നതാണ് തിരിച്ചുവിളിക്കലിന്റെ ലക്ഷ്യം. ഇതുവഴി വാഹന ഉടമകളുടെ സുരക്ഷ ഉറപ്പാക്കാൻ കഴിയും.
കമ്പനി രജിസ്റ്റർ ചെയ്ത സർവീസ് സെന്ററുകൾ വഴി ഈ മോഡലിൽപെട്ട എല്ലാ വാഹനങ്ങളും പരിശോധിക്കുകയും ആവശ്യമെങ്കിൽ ഭാഗങ്ങൾ മാറ്റിസ്ഥാപിക്കുകയോ സോഫ്റ്റ്‌വെയർ അപ്‌ഡേറ്റ് ചെയ്യുകയോ ചെയ്യും. ഇത് ഉപഭോക്താക്കൾക്ക് പൂർണ്ണമായും സൗജന്യമായിരിക്കും.
തങ്ങളുടെ കാർ തിരിച്ചുവിളിക്കപ്പെടുന്ന വിഭാഗത്തിൽ പെടുന്നുണ്ടോ ഇല്ലയോ എന്ന് ഉറപ്പാക്കാൻ കാറിന്റെ VIN നമ്പർ പരിശോധിക്കണമെന്ന് കമ്പനി ഉപഭോക്താക്കളോട് അഭ്യർത്ഥിച്ചു. കാറിൽ നിന്ന് അസാധാരണമായ ഗന്ധമോ പുകയോ അങ്ങനെയെന്തെങ്കിലും അനുഭവപ്പെട്ടാൽ, ഉടൻ തന്നെ വാഹനം ഓഫ് ചെയ്ത് സർവീസ് സെൻററിൽ നിന്നും സഹായം തേടുക.
മഴക്കാലത്ത് പ്രത്യേകം ശ്രദ്ധിക്കുകയും ഡീഫ്രോസ്റ്റ് മോഡ് ഉപയോഗിക്കുകയും ചെയ്യുക. മോഡലുകളിൽ ഏതെങ്കിലും നിങ്ങളുടെ കൈവശമുണ്ടെങ്കിൽ, ഉടൻ തന്നെ നിങ്ങളുടെ അടുത്തുള്ള മെഴ്‌സിഡസ് ബെൻസ് ഡീലർഷിപ്പുമായോ സർവീസ് സെന്ററുമായോ ബന്ധപ്പെടണം.
