സാധരണനിലയിൽ ദീര്‍ഘദൂരങ്ങളിലേക്കുള്ള യാത്രകള്‍ക്കാണ് കൂടുതൽപ്പേരും ടാക്സി വാഹനങ്ങള്‍ ബുക്ക് ചെയ്യാറ്. എന്നാൽ വെറും 180 മീറ്റര്‍ മാത്രം യാത്ര ചെയ്യുന്നതിനായി ഒരു യുവതി ടാക്സി ബൈക്ക് ബുക്ക് ചെയ്ത സംഭവമാണ് ഇപ്പോള്‍ ചര്‍ച്ചാ വിഷയമാകുന്നത്. ഇതു സംബന്ധിച്ച് ബൈക്ക് റൈഡർ പങ്കുവെച്ച വീഡിയോ ആണ് സോഷ്യല്‍ മീഡിയയില്‍ വൈറലായിരിക്കുന്നത്. യുവതിയെ പിക് ചെയ്യുന്നതിനായി എത്തിയ ഡ്രൈവര്‍ അവരോട് ഒടിപി ചോദിക്കുന്നതോടെയാണ് വീഡിയോ തുടങ്ങുന്നത്.
എന്നാല്‍ അത് കൊടുത്തപ്പോള്‍ അവരെ ഇറക്കേണ്ട സ്ഥലം കേവലം 180 മീറ്റര്‍ മാത്രം അകലെയാണെന്ന് ഡ്രൈവര്‍ ഫോണിൽ കണ്ടു.
ഇത്രകുറഞ്ഞ ദൂരം യാത്ര ചെയ്യാനാണോ വാഹനം ബുക്ക് ചെയ്തതറിഞ്ഞ് ഡ്രൈവര്‍ തെല്ലൊന്ന് ആശയക്കുഴപ്പത്തിലായി. ശരിയായ സ്ഥലം തന്നെയാണോ ഡ്രോപ് ചെയ്യാൻ തിരഞ്ഞെടുത്തതെന്ന് അയാള്‍ യുവതിയോട് ചോദിച്ചു.
എന്നാല്‍ പോകേണ്ട സ്ഥലം അത് തന്നെയാണെന്നും എന്നാൽ പ്രദേശത്ത് തെരുവുനായ ശല്യം രൂക്ഷമാണെന്നും അത് ഒഴിവാക്കാന്‍ വേണ്ടി മാത്രമാണ് ബൈക്ക് റൈഡ് തിരഞ്ഞെടുത്തെന്നും അവര്‍ വ്യക്തമാക്കി.
തെരുവുനായ്ക്കളെ ഭയമാണെന്നും നടന്നുപോകാന്‍ പേടിയാണെന്നും അവര്‍ വിശദീകരിച്ചു. കാരണം കേട്ട് ഡ്രൈവര്‍ അമ്പരന്നുപോയെങ്കിലും യുവതിയെ ലക്ഷ്യസ്ഥാനത്തുതന്നെ ഇറക്കി. യാത്രയ്ക്ക് യുവതി 19 രൂപയാണ് നല്‍കിയത്.
കുറഞ്ഞ ദൂരം മാത്രം യാത്ര ചെയ്യുന്നതിന് ബൈക്ക് ബുക്ക് ചെയ്യാന്‍ യുവതി തീരുമാനിച്ചത് സോഷ്യല്‍ മീഡിയയെയും അമ്പരിപ്പിച്ചു. എന്നാല്‍, ഡ്രൈവര്‍ ഗൗരവത്തോടെ ഒരു പ്രൊഫഷണലായി പെരുമാറിയതിനെ ചിലര്‍ അഭിനന്ദിച്ചു.
